Do Biwiyan Or Adal By Shazil Saeed || دو بیویاں اور عدل

                             "دو بیویاں اور عدل "

میں سوچتا ہوں کہ مرد اتنا حوصلہ کہاں سے لاتا کچھ عرصہ قبل ہمارے علاقے میں ایک پچیس چھبیس سالہ

لڑکی کو طلاق دے دی گئی اور شوہر نے بچے چھین لئیے لڑکی کا نام طوبیٰ فاروق تھا انتہائی سلجھی ہوئی شریف اور باکردار لڑکی تھی یتیم تھی بھائی کوئی تھا نہیں لہذا سسرال والوں نے زرخرید غلام بنا کر رکھی ہوئی تھی طوبیٰ نے فزکس کے ساتھ ماسٹر کر رکھا تھا اس کی شادی کو سات سال کا وقت گزر چکا تھا تین بچے تھے اور پھر اچانک اس کے شوہر کو کسی اور لڑکی سے محبت ہو گئی اپنی محبت سے نکاح کے لئیے اس نے اپنی پہلی بیوی طوبیٰ سے اجازت مانگی تا کہ قانونی چارہ جوئی سے محفوظ رہ سکے تو اس کی بیوی نے مشروط اجازت دیتے ہوئے کہا کہ تینوں بچوں کےلئے مناسب خرچہ لکھ کر دے دیں تو دوسری شادی کر لیں تا کہ آپ بچوں کی طرف توجہ نہ بھی دیں تو مجھے پرورش کی دقت نہ ہو میرے بچوں کی پرورش ہو سکے گو کہ طوبیٰ کی ساری باتیں برحق تھیں مگر اس کے شوہر نے ان کو انا مسئلہ بنایا تو اور تینوں بچے چھین کر اسے بد چلن کہہ کر طلاق دے دی بچے چھن جانے گھر اجڑنے اور دوسری آزمائشوں کے آن پڑنے سے طوبیٰ کا ذہنی توازن بگڑ گیا چند دن پہلے میں نے اسے بازار میں اپنی ماں کے ساتھ جاتے دیکھا تھا اسے ہاتھوں اور پیروں میں وزنی لوہے کے زنجیر ڈالے ہوئے تھے تا کہ وہ دوڑ نہ سکے جبکہ وہ ماں سے التجا کر رہی تھی ماں ہاتھوں والی زنجیر کھول دو بہت بھاری ہے اور اس کی ماں بہتے آنسوؤں کے ساتھ مسکرا کر اس کا دوپٹہ ٹھیک کر رہی تھی اسی دوران طوبیٰ قریب سے گزرتے ہوئے بچے کو میرا بیٹا پکارتے ہوئے اس کی جانب لپکی تو اس ماں نے جلدی سے اس کے پیروں والی زنجیر پکڑ لی جھٹکا لگنے سے طوبیٰ منہ کے بل گری اور بچوں کی طرح روتے ہوئے اپنی ماں کو بد دعائیں دینے لگی ۔۔۔۔۔۔۔۔ 

ہماری ایک رشتہ دار لڑکی کو بھی طلاق ہوئی تھی وجہ صرف یہ تھی کہ اس کے شوہر نے بھی دوسری شادی محبت کی کر رکھی تھی اور ایک دن شوہر کی محبوبہ بیوی نے اپنی سوتن ( ہماری رشتہ دار) لڑکی سے پانی مانگا تو ہماری رشتہ دار لڑکی نے اس کے کمرے گلاس لیا اور فریج سے پانی نکال کر پہلے خود پی لیا اور پھر سوتن کو دے دیا جس پر اسے اس کے شوہر نے یہ کہتے ہوئے اسے طلاق دے دی کہ تمہاری جرات کیسے ہوئی میری محبوبہ کے برتنوں میں پانی پینے کی ہماری وہ عزیزہ آج بھی ماں کی دہلیز پر بیٹھی دن کاٹ رہی ہیں اور ان کی خاموشی دیکھ کر لگتا ہے کہ تھوڑے سے عرصے کی اس آزمائش نے ان کی ساری زندگی کی خوشیاں اور مسکراہٹیں چھین لی ہیں ۔۔۔۔ 

ان دونوں واقعات میں بظاہر غلطی شوہروں کی ہے مگر وہ لوگ آج بھی ڈھٹائی کے ساتھ اپنی سابقہ بیویوں کی کردار کشی کرتے نظر آتے ہیں بلکہ ان کے ساتھ بستر پر گزارے لمحات کا ذکر سر محفل کر کے لوگوں میں ان کا مذاق اڑاتے ہیں میں نے چند دن پہلے ہی امہات المومنین اور نبی کریم صلی اللہ علیہ وآلہ وسلم کی محبت کے واقعات پر لکھی ایک کتاب پڑھنا شروع کی ہے اس میں سے دو واقعات آپ کے سامنے رکھنا چاہتا ہوں

اُم المؤمنین سیدہ عائشہ صدیقہ رضی اللہ عنھا فرماتی ہیں کہ میں آپ ﷺکے پاس حریرہ لائی جو میں نے آپ ﷺ کیلئے تیار کیا،میں نے ام المؤمنین سیدہ سودہ رضی اللہ تعالی عنھا سے جو وہاں موجود تھیں کہا کہ تم بھی کھاؤ،اُنہوں نے کسی وجہ سے کھانے سے انکار کیا۔میں نے کہا یا تو کھاؤ ورنہ میں اسے تمہارے منہ پر مل دونگی،اُنہوں نے پھر بھی انکار کیا تو میں نے حریرہ سے ہاتھ بھر کر انکے منہ پر مل دیا۔حضور نبی کریم ﷺ دیکھ کر مسکرائےاور(ام المؤمنین سیدہ عائشہ صدیقہ رضی اللہ عنھافرماتی  ہیں کہ )آپ ﷺ نے مجھےاپنےہاتھوں سےمجھےدبایا(تاکہ عائشہ صدیقہ رضی اللہ عنھامدافعت نہ کرسکیں)اور آپ ﷺ نےاُم المؤمنین سیدہ سودہ رضی اللہ تعالی عنھاسےفرمایا تم بھی حریرہ(سیدہ )عائشہ صدیقہ (رضی اللہ عنھا) کے منہ پر لگاؤ،اُنہوں نے حریرہ میرے منہ پر لگایا، تو آپﷺ مسکرائے۔ یہ قصہ آپ ﷺ کا ازواج مطہرات سے حسن سلوک اور ازواج مطہرات رضی اللہ تعالی عنھن کا آپس میں بے تکلف اور محبت کا واضح ثبوت ہے۔

اُم المومنین سیدہ عائشہ صدیقہ رضی اللہ عنھا سے  روایت ہے بیان کرتی ہیں کہ خدا کی قسم ! میں نے یہ منظر دیکھا ہے کہ(ایک روز )حبشی نابالغ لڑکے مسجد میں نیزہ بازی کر رہے تھے،حضور نبی کریم ﷺ اُن کا کھیل مجھے دکھانے کے لیےمیرے لیےاپنی چادر کا پردہ کرکےمیرے حجرے کے دروازے پر کھڑے ہوگئے(جو مسجد میں کھلتا تھا)میں آپﷺ کے کاندھے کےدرمیان سے اُن کا کھیل دیکھتی رہی ، آپ ﷺ میری وجہ سے مسلسل کھڑے رہے،یہاں تک کہ(میرا جی بھر گیا)اور میں خود ہی لوٹ آئی۔(مسلم شریف،892 ، بخاری شریف 5236,ترمذی شریف 3691)

مجھے یہ دونوں واقعات بہت پسند آئے پہلے واقع میں بتایا گیا کہ کس طرح دونوں بیویوں کے درمیان عدل و انصاف قائم رکھا گیا ہے کسی کو بھی محبت و الفت کی بنا پر ترجیح نہیں دی گئی اور دوسرے واقع میں بتایا گیا ہے کہ کس طرح بیوی کی پسند اور تفریح کا خیال رکھا گیا ہے ان دو واقعات نے مجھے جھنجوڑ کر رکھ دیا شاید اگر آپ میں سے بھی کوئی غور کرے تو اسے سمجھ آ جائے کہ 

دوسری شادی بھلے ہی آپ محبت سے اور اپنی من پسند کی کرتے ہیں مگر آپ کبھی بھی اپنی محبوب بیوی کو دوسری بیوی پر ترجیح نہیں دے سکتے آپ کے لئیے بیویوں کے حقوق ادا کرنے میں عدل و انصاف قائم رکھنا ضروری ہے ۔۔۔۔۔ 

نبی کریم صلی اللہ علیہ وآلہ وسلم کی اپنی ازواج مطہرات سے محبت دیکھ کر میں سوچ رہا ہوں اوپر والے واقعات میں موجود لڑکیوں کے شوہر روز محشر اپنے اقدامات کو کس طرح ٹھیک ثابت کریں گے نبی کریم صلی اللہ علیہ وآلہ وسلم کی امت کی بیٹیوں کو محبت نامی وقتی جذبے کی خاطر عمر بھر کا روگ دے کر کس طرح ان رسول خدا صلی اللہ علیہ وآلہ وسلم سے روز محشر شفاعت کے طلبگار ہوں گے ؟

انہی سوالوں کے ساتھ میں آپ لوگوں بتانا چاہتا ہوں کہ

"حضرت جابر بن عبداللہi کی حدیث میں ہے، نبی کریمﷺ نے حجۃ الوداع کے موقع پر وعظ فرمایا جس میں عورتوں کے معاملے میں فرمایا: عورتوں کے معاملے میں اللہ سے ڈرو کہ جس کے نام پر تم نے اسے حاصل کیا، اور اسی کے نام سے وہ تمہارے لیے حلال ہوئیں ۔ (صحیح مسلم: 1218)"

اختتام

Baca juga